Türkiyənin Kütahya şəhərində dövlət tərəfindən alınması planlaşdırılan fərdi yaşayış evinin boşaldılması zamanı gərgin anlar yaşanıb. Bu hadisə ictimaiyyətdə böyük rezonans doğurub.
84 yaşlı Mürvət Dəmiş və oğlu evin boşaldılması üçün gələn şəxslərə etiraz ediblər. Hadisə yerinə polis və bələdiyyə işçiləri cəlb olunub, tərəflər arasında ciddi gərginlik yaranıb. Uzun sürən danışıqlar və razı salma cəhdlərindən sonra evin boşaldılması prosesi yekunlaşıb.
Bələdiyyə tərəfindən verilən məlumata görə, mülkün alınması üçün nəzərdə tutulan kompensasiya hüquq sahiblərinə ödənilib. Həmçinin qeyd edilib ki, həmin daşınmaz əmlak şəhərsalma planında yol ərazisi kimi təyin edilib. Hadisə ilə bağlı görüntülər sosial şəbəkələrdə geniş yayılaraq müzakirələrə səbəb olub.