“Aid-Group” şirkətinin təsisçisi Nigar Fərhadın müştəri şikayətləri fonunda yoxa çıxması geniş müzakirələrə səbəb olub. Şirkət fəaliyyətini dayandırdığını elan edərək, sosial şəbəkə hesabında müvəqqəti fasilə verdiyini və iş prosesi bərpa edildikdən sonra əlavə məlumat veriləcəyini bildirib.
Nigar Fərhad haradadır?
Şikayətçilərin iddiaları və şirkətin fəaliyyətini dayandırması fonunda Nigar Fərhadın hazırda harada olduğu bilinmir. O, telefon zənglərinə cavab vermir və mövzuya dair hər hansı bir açıqlama yaymır. Qeyd edək ki, Nigar Fərhadın qızı hazırda ABŞ-da təhsil alır.
Hüquq-mühafizə orqanlarının mövqeyi
Vətəndaşlar arasında yaranan narazılıqlara baxmayaraq, Daxili İşlər Nazirliyi və Baş Prokurorluq məsələnin onların səlahiyyətlərinə aid olmadığını bildiriblər. Bu açıqlama, zərərçəkmişlərin hüquqi müstəvidə yaranmış vəziyyətlə bağlı narahatlıqlarını daha da artırıb.
Şirkətin maliyyə vəziyyəti və şikayətlər
Son günlər sosial şəbəkələrdə və müxtəlif platformalarda “Aid-Group” şirkəti ilə bağlı çoxsaylı şikayətlər yayılıb. Vətəndaşlar xaricdə təhsil proqramları üçün şirkətə minlərlə manat ödədiklərini, lakin vəd olunan xidmətləri ala bilmədiklərini iddia edirlər. Müqavilə öhdəliklərinin yerinə yetirilmədiyi və şirkətlə əlaqə saxlamaq cəhdlərinin nəticəsiz qaldığı bildirilir. Həmçinin, “AID Group”un tərkibindəki “AID Language Center” MMC-nin dövlətə 3277 manat vergi borcu olduğu və hazırda “passiv” statusda fəaliyyət göstərdiyi məlum olub. Şirkətin qanuni təmsilçisi aparıcı Nigar Fərhadın anası Arzu Hidayət qızı Əliyevadır.